Bunge latoa madawati 400 halmashauri ya Arusha

Na. Elinipa Lupembe.

Kutokana na ongezeko la wanafunzi wanoandikishwa kuanza elimu ya awali na darasa la kwanza katika shule za msingi za serikali na kusababisha upungufu wa madawati, Bunge la Jamhuri ya Muungano Tanzania limetoa jumla ya madawati 400 kwa ajili ya shule za msingi za halmshauri ya Arusha.

Akizungumza na mwandishi wa habari hizi wakati wa kupokea madawati hayo Afisa Elimu Msingi halmshauri ya Arusha mwalimu Tumsifu Mushi amesema kuwa madawati mia  nne (400) tuliyopokea yamekuja wakati muafaka kwa kuwa halmshauri ilikuwa inakabiliwa na upungufu wa madawati 840 kutokana na ongezeko la wanafunzi walioandikishwa mwaka huu 2017.

Mushi amesema kuwa mwaka 2017 halmashauri ilikisia kuandikisha wanafunzi 9,595 badala yake waliandikishwa wanafunzi 13,030 sawa na asilimi 135.8% sawa na ongezeko la aslimia 25.8 % ukilinganisha na idadi iliyoandikishwa mwaka jana 2016 kutoka na hali hiyo madawati haya tuliyopokea yamefanya kuwa na upungufu wa madawati 440.

Akizungumzia uwiano wa ongezeko la wanafunzi ukilinganisha na idadi ya madarasa,  Afisa Elimu huyo amesema kuwa tatizo la vyumba vya madarasa kwa mwaka huu limepungua kwa kiasi kikubwa ingawa halijaisha kutokana na halmshauri kutoa kiasi cha shilingi milioni 420 kutoka kwenye fidia ya deni la shamba la Lakilaki, fedha zilizotumika kwenye ukarabati wa miundo mbinu ya shule ikiwemo vyumba vya madarasa na vyoo.

“Kwa mwaka uliopita wa fedha 2016/17 halmashauri imetumia shilingi milioni 420 kupunguza changamoto ya vyumba vya madarasa na mpaka sasa baadhi ya madarasa yamekamilika na mengine yako katika hatua za umaliziaji” amesema Mushi

Mwenyekiti wa Halmashauri ya Arusha Mheshimiwa Noah Lembris ameipongeza serikali kupitia Ofisi ya Bunge kwa kuona umuhimu wa kutatua changamoto ya madawati katika shule  za halmshauri ya Arusha.

Mwenyekiti Noah ameendelea kueleza kuwa licha ya halmashuri kushirikiana na wadau kutengeneza madawati zaidi ya 5,000 lakini bado changamoto haikumalizika kutokana na idadi kubwa ya watoto waliojitokeza mwaka huu kuandikishwa kujiunga na elimu ya awali na darasa la kwanza hali iliyotokana na serikali kutangaza utoaji wa bure.

Hata hivyo Mkurugenzi Mtendaji halmashauri ya Arusha Dk. Wilson Mahera amesema kuwa ingawa sekta ya elimu inakabiliwa na changamoto nyingi lakini kwa mwaka wa fedha ulioisha halmashuri ilijikita zaidi kwenye kutatua changamoto za madawati, miundo mbinu ya shule pamoja na kupandisha kiwango cha ufaulu kwa wanafunzi.

Aidha Dk. Mahera amefafanua kuwa kwa mwaka huu wa fedha halmashuri imejipanga kuelekeza nguvu nyingi katika ujenzi wa nyumba za walimu tatizo ambalo linasababisha mkwamo hasa kwa shule za pembezoni pamoja na kushirikiana na wadau kuendelea kutatua changamoto ya madawati.

“Bajeti ya mwaka huu tutajenga nyumba za walimu hasa kwenye shule zetu za pembezoni ili walimu waishi karibu na shule jambo ambalo litaongeza tija na ufanisi katika suala zima la ufundishaji na ujifunzaji kwa wanafunzi.” Amesisitiza Dk. Mahera.